كشفت الإعلامية دعاء فاروق عن تفاصيل زيارتها لمنزل الكينج محمد منير بالأمس، وذلك من خلال منشور عبر حسابها الشخصي على موقع التواصل الاجتماعي فيسبوك.

أحدث ظهور للكينج محمد منير

ونشرت دعاء فاروق مجموعة صور من زيارتها لمحمد منير رصدها موقع تحيا مصر، وعلقت عليها وكتبت: على غرار الصوت الشهير اللي بيقول أنا طلعت في التلفزيون، أنا ممكن اعمل صوت بنفس الانبساط والدهشة بيقول أنا زورت الكينج محمد منير في بيته وعشان متحتاروش وتقولوا ايه اللي جاب القلعة جنب البحر الموضوع ببساطة ان ريهام ابراهيم صديقتي الجميلة كانت بتزورني امبارح للاطمئنان علي ديدو ابني.

وتابعت دعاء فاروق: وفي وسط القاعدة تركتها ودخلت المطبخ وإذا بروكي بنوتي جت تقولي الحقي يا ماماه ده ريهام بتكلم محمد منير في التليفون عادي قلت لها اه يا روكي ما ريهام من اصدقائه المقربين جدا منذ سنوات طويلة ودخلت علي ريهام وقلت لها كواحدة مصرية أصيلة ممكن تحشر نفسها في مكالمه لا تخصها بتاتا سلميلنا عليه يا ريهام وقوليله ان كلنا بنحبه.. واعتقد ده العادي بتاع اي كائن مصري سامع صوت محمد منير طالع من السماعة اللي جنبه … فإذا بريهام تقول له طب خد دعاء فاروق عاوزة تكلمك.

تفاصيل زيارة دعاء فاروق للكينج محمد منير

واضافت: وكانت مفاجاة لطيفة لانه لطيف جدا جدا لدرجة اني لما بقول له علي فكرة جوزي بيحب يسمعك جدا وفعلا هو مطرب عماد المفضل قال لي بمنتهي اللذاذة ( الله الله ) خلصت المكالمة بكلمات الثناء اللطيفة وانهيتها  بإن شاء الله تيجي فرصه واشوف حضرتك قريب فكانت المفاجأة انه قال لي اتفضلي نوريني مع ريهام بكرة.

دعاء فاروق عن محمد منير: نجم كبير وقيمة كبيرة

واختتمت دعاء فاروق منشورها وكتبت: نجم كبير وقيمة كبيرة وعلي قدر نجوميته علي قدر تواضعه ولطفه الشديد في استقبالنا وفرحت جدا لما قال لي انه أتفرج عليا النهاردة الضهر في برنامجي في الصورة ريهام ابراهيم اللي بشكرها بجد علي المفاجأة والزيارة الحلوة دي وعازفة الهارب الجميلة ياسمين حربي اللي اتعرفت عليها من خلال ريهام ابراهيم من سنتين وحبيتها جدا جدا.. النهاردة ٥ مايو ٢٠٢٥ يوم احب اوثقه يوم زيارة الكينج محمد منير.